Жорий йилнинг 10-12 ноябр кунлари «Ўзэкспомарказ» МКК» АЖда «TransLogistica Uzbekistan 2026» ва «Securex Uzbekistan 2026» халқаро кўргазмалари бўлиб ўтмоқда.

Кўргазмаларда 16 та мамлакатдан 120 та компания ва бренд иштирокида транспорт логистикаси ҳамда хавфсизлик соҳасидаги илғор технологиялар ва инновацион ечимлар намойиш этилмоқда.

«TransLogistica Uzbekistan» кўргазмасида халқаро экспедиторлик ва мультимодал юк ташиш хизматлари, темир йўл логистикаси, омбор ва терминал хизматлари, шунингдек, юк ташиш ва ташқи савдо операцияларини бошқаришга мўлжалланган рақамли платформалар соҳасидаги ечимлар тақдим этилмоқда.

«Securex Uzbekistan» экспозициясида замонавий видеокузатув, киришни назорат қилиш ва бошқариш тизимлари, қўриқлаш сигнализацияси, ёнғинни ўчириш ускуналари, ёнғин-қутқарув жиҳозлари, криминалистика технологиялари ҳамда ҳимояланган алоқа тизимлари намойиш этилади.

Ушбу кўргазмалар ишлаб чиқарувчилар, ускуна етказиб берувчилар, логистика компаниялари ва соҳа мутахассисларини бир майдонда бирлаштириб, уларга янги маҳсулот ва технологиялар билан танишиш, ишбилармонлик алоқаларини кенгайтириш ҳамда самарали ҳамкорликни йўлга қўйиш имконини беради.

Ташкилотчилар: Iteca Exhibitions халқаро кўргазма компанияси ва унинг ҳамкори ICA Eurasia Group.